Søgusavn í Vestmanna Tourist Centre

Seinasta hond verður nú løgd á Søgusavnið í Vestmanna.

Tilsamans 17 persónsfigurar, sera meinlíkir veruligum fólkum, vera á savninum. Figurarnir eru gjørdir í Íslandi. 

Harumframt er sjálv pallmyndin gjørd av navnframum føroyskum listafólki - Pól Skarðenni og Edvard Fuglø. Herleif Hammer, søgufrøðingur, hevur verið við frá byrjan og samskipað arbeiðið.

Fyrstu figurarnir til savnið komu í 2007, talan er um Brest, pápa Sigmund, og banamann hansara Havgrím - sí myndina.

Søgnin sigur, at brøðurnir Brestir og Beinir vórðu tiknir á bóli av fíggindum ein dagin teir vóru í Dímun eftir seyði. Hóast teir vardu seg og synirnar Sigmund og Tór manniliga, so varð endin at teir máttu lúta fyri fíggindunum, sum vóru nógv mannsterkari og høvdu betri vápn.

Fyrstu figurnarnir lýsa hesa søguna. Havgrímur hevur júst rent spjótið gjøgnum Brest, og tá hesin kennir sær banasár hálar hann spjótið enn longur inn fyri at røkka Havgrími og høgga hann niður eisini.

Savnið letur upp fyrst í mei 2009.